Archive for February, 2009

St! pembatjakoe, dengar! saja maoe kasi taoe satoe roepa obat. Obat ini ada obat boewat bikin orang bole idoep lebi lama. Kaloe kowe kapengin idoep lebi lama, misti kenal obat ini.

Kaloe kowe biasa bangoen pagi poekoel anam dan kowe biasain bangoen poekoel lima pagi, kowe nanti bole idoep lebi lama.

He! kenapa bagitoe? Kaloe bagitoe, saja nanti bangoen lebi pagi deri poekoel lima.

Semingkin kowe bangoen lebi pagi, semingkin kowe idoep lebi lama. Coba dengar. Saoerang jang biasa bangoen poekoel anam, kaloe bangoen poekoel ampat, lantas dalam satoe hari ija idoep doewa djam lebi lama deri biasa. Satoe hari 2 jam, satoe boelan 60 djam, satoe tahon 720 djam. Kaloe satoe anak oemoer sapoeloeh tahon, soeda moelain bangoen doewa djam lebi pagi deri biasanja, lantas pada oemoernja 70 tahon, ija ada idoep 5 tahon lebi lama deri watasnja.

(disadur dari Kitab Edja A.B.C, Lie Kim Hok, 1884)

Comments 3 Comments »

Pewarta Soerabaja, 8 September 1925

Tanggal 4 ini boelan Sie Tiat telah bikin pertandingan sama Sladek Sr. di Passer Malem di Toeloengagoeng, sedeng The Djie Liong dengen Sladek Jr., masing2 dilakoeken dalem 10 ronde dari 2 menit.

Sedari djam poekoel 7 roewangan boksen soeda moelai padet dengen penonton dan di antara marika ada djoega assistent-resident, controleur dan luitenant Tionghoa.

Seprangkat moeziek saben2 kasi denger soearanja jang merdoe.

Djam 8.30 pertandingan dimoelai dengen demonstratie antara Nobele dan Kwee Liong Tjing (satoe sportman dari Kediri) dalem 2 ronde dari 2 menit.

Sasoedanja itoe diadaken demonstratie antara The Tjwan Liong (bokser Tionghoa dari Soerabaja jang baroe ini telah kalaken Lazar Jr. dengen punt di Solo) dan Han Tjwan Tjhiang, sala satoe pemoeda dari Kediri dan neef dari bokser Tionghoa Han Tjwan Ho.

Ini demonstratie dibikin boewat 3 ronde, dan doea2 demonstratie menjenangken pada penonton.

Poen penonton dapet banjak kagoembiraan dari pertandingan antara The Djie Liong, soedara toea dari The Tjwan Liong, contra Sladek Jr. boewat 10 ronde dari 2 menit dengen 1 menit mengaso.

Achirnja pertandingan Djie Liong dinjataken menang punt dan disamboet dengen tampik-soerak jang rioe Hoofdpartij ada antara Sie Tiat dari Soerabaja, beratnja 62 K.G. dan Sladek Sr. dari Kediri, berdirinja 65 K.G., boewat 10 ronde dari 2 menit dengen 1 menit mengaso.

Toean G.T.Liem pimpin ini pertandingan sebagi referee, samentara toean Liem Biauw Kiem djadi timekeeper.

Dalem ronde ka 1 doea2 berlakoe kalm; koetika ronde ampir abis, Sie Tiat kirim ija poenja serie-slagen.

Referee kasi tegoran pada Sladek, sebab ija terlaloe banjak clinch.

Dalem ronde ka 2 Sie Tiat kirim banjak poekoelan di bagian moekanja Sladek, jang toeloeng dirinja dengen toetoep moekanja sama kadoea tangan.

Dalem ronde ka 3 Sie Tiat lantes menjerang dan satoe poekoelan uppercut bikin Sladek tjioem papan. Sampe itoengan ka-ampat ija bangoen lagi, tapi dalem ini ronde ija keliatan sedikit paja.

Dalem ronde ka 4 napasnja Sladek keliatan moelai abis lantaran terlaloe banjak trima serangan.

Ija tiada berboeat laen dari pada trima poekoelan2 dari itoe bokser Tionghoa.

Tatkala ronde ka 5 maoe dimoelai, Sladek menjataken, ija menjera kala dan Sie Tat -disamboet dengen moeziek dan tampik-soerak rioe dari penonton-dinjataken menang.

Sasoedanja itoe Sie Tiat, jang keliatan blon tjape, telah bikin demonstratie dengen Nobele dalem 3 ronde.

Toean G.T.Liem, atas namanja comite Passer Malem, hadiahken pada jang menang masing2 satoe medaille perak dan satoe eerediploma.

Comments No Comments »

Ada satoe djenis masakan jang saja belon dapet mendjoempain di saanteronja Djakarta ini, iaitoe satoe djenis masakan tjoemi² jang dimasak dengen tintanja sekaligoes.

Makanan ini berasa asin, manis, goerih. Apa jang memboeatnja trasa begitoe goerih? Iaitoelah rasa jang berasal daripada tintanja.

Kerna di Djakarta tida ada mendjoeal masakan ini, maka sasoedahnja bertanja² tentang recept pemboeatan ini masakan, saja mentjoba oentoek memasak ini Tjoemi².

Mmm, it’s so lekker ja..

Cumi - jadi

Mahoe tahoe tjara pembikinannja?

Description:
Tjoemi² (sematjam hewan dari laoet jang mempoenjai tinta) jang dimasak dengan tintanja..

Ingredients:
Tjoemi² setjoekoepnja
Asem djawa setjoekoepnja
Garem setjoekoepnja
Goela pasir setjoekoepnja
Minjak goreng setjoekoepnja

Directions:
Masoekken tjoemi² jang soeda ditjoetji (loearnja sadja, djangan boeang isi tjoemi² poenja peroet) ke dalem wadjan. Tambahken garem, goela dan asem djawa setjoekoepnja.
Njalaken api.
Nanti akan keloear itoe aer & tinta dari dalem toeboeh itoe tjoemi².
Biarken api tetep menjala ketjil, sampe airnja sat (kering), tinggal tintanja.
Masoekken sedikit sadja minjak goreng.
Goreng² sasoeai toan²/njonja² poenja salera.

Cumi - Masak

Comments 1 Comment »

NOVEMBER 1931
Kongtjotjo Poenja Sepoeloe Larangan.

Oleh: Mej. Tjiong Djie Nio
Semarang.

1. Bila kau soeda mengindjek di mana lapangan bernikah, djangan sekali kau males berdandan dan soengkan berias,kaloe kau tida ingin boewang itoe sarinja kabroentoengan; tapi kau haroes djaga djoega dengen djoedjoer itoe kabroentoengan mendjadi kekel.

2. Aken dapetin Itoe kabroentoengan, kau haroes djangan loepa djaga kau poenja kwarasan badan, kerna kasehatan ada penting sekali berhoeboeng dengen segala masaikan di dalem dapoer. Ambilah Ini tindakan jang tida menelen ongkos besar, perhatiken semoeanja hidangan jang kloear dari dapoer boem-boenja merasa sedep dan enak; kau bisa lekas boektiken brapa besar kau poenja soeami nanti hatoerken banjak trima kasi.

3. Apabila kau taoe soeamimoe tinggal dalem roemah doedoek mengasoh, djangan goenaken itoe tempo bikin dijengkelnja ia poenja pikiran, dengerken segala tetek-bengek jang koerang perloe atawa kaperloean roemah-tangga ini dan itoe koerang; kasilah ia mengerti perloe sekali ambil tempo boeat bebrapa hari doedoek mengasoh, atawa pergi tetira di mana kota jang hawanja dingin. Nanti la kombali lagi dengen badan sehat dan penoeh kagoembirahan aken sampeken apoenja kwadjiban berlipet ganda.

4. Djangan ambil perhatian dari iapoenja familie atawa sobat-andenja; pertjajalah pada dirinja seperti djoega kau pertjaja pada badanmoe sendiri boeat bikin iapoenja kabaekan. Nanti ia poedji tinggi kau poenja kamoelia’an dan tida gampang moesna dari iapoenja pengrasa’an tjinta.

5. Djangan se’kali kau tjelah dan menjomel bila soeamimoe pake dasi atawa pakean jang kau rasa koerang, seneng, atawa kabetolan sekali ia isep cigaret bikin kau tida tahan dari mengeboelnja asep. Kau haroes pikir iapoenja kasoeka’an dan kainginan sama sadja seperti djoega kau poenja kamaoean dan kasenengan.

6. Djangan kau mendjadi poetoes harepan hadepken soeamimoe di dalem oering-oeringan, biarpoen jang mendjadiken pokoh dan soeal ada satoe prempoean jang paling tjantik; kerna itoe soeda djamaknja orang prempoean koedoe intjerken kadoea matanja, apa dirinja lebih manis dipandeng terhadep pada laennja. Djoestroe ini toeladan kau haroes tiroe seperti djoega laikoenja itoe prempoean. Lebih agoeng kau oendjoeken kau poenja katinggian hati, lebih toendoek ia nanti briken kahormatan.
Tapi ! Inget djangan kau berlakoe tjongkak, kerna dirimoe djoega ada satoe prempoean.

7. Bila kau taoe soeamimoe poelang roemah membawa bingkisan, sekalipoen itoe bingikisan terisih satoe barang bilkin kau merasa koerang seneng, atawa beroepa satoe pakean bila kau pake matjemnja seperti orang oetan; trimalah dengen penoeh kagoembirahan dengen kadoea tanganmoe srentah brikoet djoega satoe tjioeman boeat iapoenja katjinta’an.

8. Bila ada sedikit karewelan jang sering kali dateng hinggapin, djangan kau mendjadi ketjil hati, goenakenlah kau poenja katadjeman mata boeat liat dari mana datengnja itoe pokoh; kerna oemoemnja kariboetan bisa dibikin ‘moesna oleh kadjinaka”an di rnana masing-masing tida mengandoeng arti apa-apa hingga kombali sampe di mana dasarnja kabroentoengan.

9. Djangan soeka roendingken dan mendongeng segala perkara jang soeda kadjadian lama, seperti djoega kau ingin sadjiken hidangan jang soeda berbaoe bazin. Inget ! kerna sedikit pertjidra’an ada salah satoe djembatan jang menoedjoe di mana pintoe Gerbang Pertjerean.

10. Inget! itoe perkata’an b e r n i k a h jang kau berdoea soeda terangkep mendjadi soeami dan istri ………… kau tjinta ia, bri’kenlah kahormatan dan rawatlah ia saben hari di waktoe ia dalem kwarasan atawa dalem sakit; loepaken segala kabintjana’an, pertjajaken kau poenja diri, badan dan soekma tergantoeng pada dirinja. Bila sawaktoe-waktoe ia bikin kasalahan, sedarken dan bikin ia mendoesin dari iapoenja piikiran jang tersesat, kerna orang lelaiki bisa mendjadi penghianat dari Iantaran orang prempoean.

Comments No Comments »

Kita hidup dalem suasana baru,
Tiada lagi didjeman merah putih biru,
Tjumah keadaannja ada sedikit keru,
Dan sering terdjadi pemogokan buruh!

Trem mogok, tukang betja girang,
Tapi tukang tjopet hasilnja kurang,
Ini akibatnja djeman sekarang,
Kekatjauan tamba, keberesan djarang!

Buruh trem telah madjukan tuntutan,
Hadiah Lebaran dua bulan gadji kontan,
Madjikan trem merasa keberatan,
Kerna sekarang trem kurang pendapetan!

Sikepnja madjikan seperti keliwatan,
Tida luluskan buruhnja punja tuntutan,
Tapi kabarnja biar trem penuh muatan,
Pendapetannja habis didjilat setan!!

Inilah sebabnja maka terbit pemogokan,
Lagi-lagi buruh bentrok dengan madjikan,
Akibatnja bikin buruh ketjil kelabakan,
Kerna bikin suker marika mentjari makan!

Buruh ketjil nasibnja paling sialan,
Laen orang berklai, sendiri dapet pukulan,
Apapula nanti kebetulan tanggung bulan,
Pergi pulang kantor banjak jang djalan.

diambil dari puisi di majalah mingguan “Starweekly” 8 Djuli 1951
Pem.Red: Mr. Auwjong Peng Koen. Wakil Pem.Red: Tan Hian Lay
Penerbit: N.V. Hd. Mij. & Drukkerij “Keng Po”
Kantor: Pintu Besar 86-88 Djakarta-Kota

Comments 1 Comment »

Pada soewaktoe saja mengoendjoengin tana kelahiran saja di Kota Koedoes, saja tida perna meliwatken makan satoe djenis masakan ini, jaitoe jang dinamaken “Lentog”. Lentog ini terboewat daripada lontong, sajoer nangka dan tahoe jang dimasak santan (cocosmelk), dan sedikit brambang goreng. Lentog ini hanja di djoewal dipagi hari, djikalaoe pagi tida habis maka bisa djoega didjoewal sampe tenga ari. Walaoepoen pendjoeal lentog ini dapat toean² dan njonja² djoempai di saantero Kota Koedoes, tapi tempat jang paling banjak terdapet pendjoeal ini makanan ada di desa Tandjoeng Karang, sebla selatan dari poesatnja Kota Koedoes. Diantara sebanjaknja pendjoeal di desa ini, saja sendiri soeda mempoenjai satoe tempat favoriet jang tijap kali saja koendjoengin oentoek dahar ini makanan. Satoe tempat itoe bertoelisken “Lentog Boe Injati”, dimana lentog disini lebi trasa goerih dan lekker di moeloet saja poenja lida. Harga satoe porsi direken pantes, jaitoe Rp 2000. Tijap kali makan saja biasanja menghabisken 3-4 porsi. (rb)

penjual-lentog

inyati

lentog

Comments No Comments »

Terdjadinja pada tanggal Saptoe, 5 April 2008

Pada soewatoe siang, saja ada mendapati satoe cutter (pisaoe ketjil) saja di dalem mobil soeda tida lempeng lagi bentoeknja. Ada satoe rasa penasaran, sebrapa panaskah soehoe di dalem mobil jang didjemoer dibawah itoe terik matahari, sahingga membikin itoe bentoek jang begitoe aneh pada satoe cutter saja? Saja laloe ada ambil satoe termometer roeweang (soewatoe alat jang bisa boeat mengoekoer sebrapa panas di dalem roewangan, tjiptaan orang olanda sana), masoekken ke dalem mobil. Komdian selang bebrapa djam, saja tjek, ternjata soehoe di dalem mobil ada mentjapai ±60ºC, dengan kelembaban sekitar 24%. Soenggoe panas sekali.

Soedah tida' lempeng lagi
Dalem mobil

Comments No Comments »